Karimkunnam Live
Flash News

Blog

കഷായത്തിന്റെ വിശ്വാസ്യത തെളിയിക്കാന്‍ സ്വയം കഴിച്ചു അബോധാവസ്ഥയിലായ ഡോക്ടര്‍ മരിച്ചു.

Sep 13, 2016, 03:46 AM IST

img-674260.jpg

 
മൂവാറ്റുപുഴ: ഒന്‍പത് വര്‍ഷക്കാലം നിശ്ചലമായി കിടന്നു, ഒടുവില്‍ ഡോക്ടര്‍ മരണത്തിന് കീഴടങ്ങി. 
കഷായത്തിന്റെ വിശ്വാസ്യത തെളിയിക്കാന്‍ സ്വയം കഴിച്ചു കാണിച്ചതിനെത്തുടര്‍ന്ന് ഒമ്പത് വര്‍ഷമായി അബോധാവസ്ഥയിലായിരുന്ന ആയുര്‍വേദ ഡോക്ടര്‍ മരിച്ചു. മൂവാറ്റുപുഴ പായിപ്ര പണ്ടിരിയില്‍ ഡോ.പി.എ ബൈജു (38) ആണ് ഇന്ന് മരിച്ചത്.
 
ഇടുക്കി ബൈസണ്‍വാലി സര്‍ക്കാര്‍ ആയുര്‍വേദ ക്ലിനിക്കിലെ ഡോക്ടറായിരുന്ന ബൈജുവിന്റെ ജീവിതത്തിലേക്ക് ദുരന്തം കടന്നു വന്നത് 2007 ജനവരി 25 നാണ്. ബൈസണ്‍വാലി കാര്യംകുന്നേല്‍ ശാന്ത എന്ന വീട്ടമ്മ, സന്ധിവാതത്തിന് ഡോ.ബൈജുവിന്റെ ചികിത്സയിലായിരുന്നു.നടക്കാന്‍ പോലുമാകാതെ എത്തിയ ശാന്തയുടെ രോഗത്തിന് ബൈജുവിന്റെ ചികിത്സകൊണ്ട് ഏറെ ശമനമുണ്ടായി. ജനവരി 24 നും ശാന്ത ഡോ. ബൈജുവിന്റെയെടുത്ത് ചികിത്സ തേടിയെത്തി.
 
'രസനപഞ്ചകം' കഷായം അന്നും കുറിച്ചുനല്‍കി. മരുന്നുമായി മടങ്ങിയ ശാന്തയുടെ ബന്ധുക്കള്‍ പിറ്റേദിവസം ഡോ.ബൈജുവിനെ അന്വേഷിച്ചെത്തി. അവരുടെ കൈയില്‍ കഷായക്കുപ്പിയുമുണ്ടായിരുന്നു. കഷായംകുടിച്ച് ശാന്ത ബോധരഹിതയായെന്നും അതിന് ഉത്തരവാദി ഡോക്ടറാണെന്നും അവര്‍ പറഞ്ഞു. ഒടുവില്‍ ഡോക്ടര്‍ തന്റെ വിശ്വാസ്യത തെളിയിക്കാന്‍ മരുന്ന് കുടിക്കുകയായിരുന്നു. ഭീഷണിയുമായി എത്തിയവര്‍ നിര്‍ബ്ബന്ധപൂര്‍വം മരുന്ന് കുടിപ്പിച്ചെന്നും ആരോപണമുണ്ട്. മരുന്നുകഴിച്ച ഡോക്ടര്‍ തല്‍ക്ഷണം ഛര്‍ദ്ദിച്ചു. പിന്നീട് ബോധവും നഷ്ടപ്പെട്ടു.
കഷായത്തില്‍ വിഷം കലര്‍ത്തിയതിന് ശാന്തയുടെ ഭര്‍ത്താവ് രാജപ്പനെ അറസ്റ്റ് ചെയ്തിരുന്നു. കുടുംബ കലഹത്തെത്തുടര്‍ന്ന് ഇയാള്‍ മരുന്നില്‍ വിഷം കലര്‍ത്തിയതാണെന്നാണ് ആരോപണം.
 
കോതമംഗലത്തെ സ്വകാര്യ ആസ്പത്രിയിലാക്കിയ ബൈജുവിനെ പിന്നീട് എറണാകുളത്തെ ഒരു ആസ്പത്രിയിലേക്കു മാറ്റി. കഷായത്തില്‍ കലര്‍ന്നിരുന്ന വിഷം അപ്പോഴേക്കും ഡോ. ബൈജുവിനെ കീഴടക്കിയിരുന്നു. ഒരു മാസത്തോളം എറണാകുളത്ത് ചികിത്സയിലായിരുന്നു. മസ്തിഷ്‌ക മരണം ഡോക്ടര്‍മാര്‍ സ്ഥിരീകരിച്ചതോടെ, മൂവാറ്റുപുഴയിലെ സ്വകാര്യ ആസ്പത്രിയിലേക്കു മാറ്റി.
പായിപ്ര പണ്ടിരിയില്‍ പുത്തന്‍ പുര ആയ്യപ്പന്‍-ലീല ദമ്പതിമാരുടെ മൂന്നുമക്കളില്‍ രണ്ടാമനാണ് ബൈജു.ഭാര്യ ഡോ.ഷിന്‍സി, മക്കള്‍: വിഷ്ണു, വൈഷ്ണവി.
 

Follow us on

© COPYRIGHT KOTTAPPADY 2015. ALL RIGHTS RESERVED